Mikkel har vakse opp på turistgarden Uppigard Natadal i Flatdal, og har tidlegare budd i Oslo, på Møsstrond og Svalbard. Han er utdanna journalist, og har jobba i mange år i media. Nå er Mikkel fruktbonde ved sida å ta på seg journalistoppdrag og drive eit firma som leverer breiband. Han er flink til å finne praktiske og tekniske løysingar på det meste på garden. Tone ser dei store linjene og detaljane, og likar å planlegge og finne vegen vidare. Tone er odelsjente, fjerde generasjon fruktdyrkar og sjette generasjon i sin familie som driv garden. Ho har utdanning i sosialantropologi og kulturstudiar, har tidlegare jobba med kulturhistore og på museum og budd i London og Oslo.

Å drive ein gard og skulle leve av han kan by på mange utfordringar. Det var ikke sjølvsagt at vi skulle flytte hit og drive garden. Det er krevande å drive jorda og ta vare på alle bygningane. Samtidig gjev det så mange muligheter til skape vår eigen arbeidsplass og til å styre vår eigen kvardag. Ikkje minst er det ein meiningsfull jobb å dyrke mat. Vi likar å jobbe med jorda og å dyrke fram mat. Vi likar å ha stor plass kring oss, vi likar å kjenne lukta av jord og grass og epleblomar på våren. Vi blir glade av å leve tett innpå skiftningar av luft og lys og fargar i naturen rundt oss kvar einaste dag.

Det er ei oppleving i seg sjølv å gå inn i bugnande, duftande frukthagar og plukke sine eigne eple eller plommer. Vi ønskjer ikkje berre å dyrke mat, vi ønskjer og å nå dirkete fram til folk og vise kva ein fruktgard kan vere. Vi vil dele litt av sesongens særpreg, stemningen på tunet og i frukthagen vår, og håper eit besøk hos oss kan vere eit lite pusterom i kvardagen.

Mikkel + Tone
Marie + Johanne